二宝斟一杯热酒，亲奉三公子呷干。三公子故意问问乡下风景，搭讪开去。二宝早自领会，抛撇愁颜，兴兴头头和三公子玩笑。二宝说道：“倪乡下有只关帝庙，到仔九月里末做戏，看戏个人故末多到个无拨数目哚，连搭墙外头树丫被浪才是个人。倪就搭张秀英看仔一埭，自家搭好仔看台，爬来哚墙头浪，太阳照下来，热得价要死！大家才说道，好看得来。像故歇大观园，清清爽爽，一干子一间包厢，请倪看，啥人高兴去看嗄。”三公子点点头。

二宝又敬两杯酒，说道：“再有句笑话告诉耐，倪关帝庙间壁有个王瞎子，说是算命准得野哚！前年倪无女每喊俚到屋里算倪几家头，俚算我末，说是一品夫人个命。俚还说可惜推扳仔一点点，勿然要做到皇后哚。倪末道仔俚瞎说，陆里晓得故歇倒拨俚算得蛮准。”三公子笑而点头。

两人细酌深谈，尽兴始散。三公子踅过房间里，向楼窗口喊声“小王”。二宝在后拦道：“我来里呀，再要喊俚哚做啥？”三公子问：“小王阿来里？”二宝道：“小王末，是倪阿哥请俚到酒馆里饯饯行。耐啥事体喊俚？”三公子道：“无啥，教俚转去收捉行李，明朝早点来。”二宝道：“晚歇倪搭俚说末哉。”三公子没甚言语，消停多时，安置不表。

次日，二宝起个绝早，在中间梳洗，不敷脂粉，不戴钗钏，并换一身净素衣裳，等三公子起身，问道：“耐看我阿像个人家人？”三公子道：“倒蛮清爽。”二宝道：“就今朝起，我一径实概样式。”说着，陪三公子吃了点心。

三公子遂令阿虎请了赵洪氏上楼厮见。三公子于靴叶子内取出一张票子交与赵洪氏，道：“我末要转去一埭，再等我一个月，盘里衣裳头面，我到屋里办得来。

耐先拿一千洋钱去，搭俚办点零碎物事。嫁妆末等我来仔再办。”洪氏不敢接受，只把眼睃二宝。二宝劈手抢过票子，转问三公子道：“耐个一千洋钱末算啥？要是开消个局帐，故末倪谢谢耐。耐说就要来讨我个末，再拨倪啥个洋钱嗄？说到仔零碎物事，倪穷末穷，还有两块洋钱来里，也酗耐费心个哉。”

三公子见如此说，俯首沉吟。洪氏接嘴道：“三老爷客气得来，难是一家人哉呀，无啥客气（口宛）。”二宝忙丢个眼色，勿令多言。赵洪氏辞别下楼。

三公子只得收起票子，喊小王打轿。二宝也坐了轿子去送三公子。先到了公馆里，发下行李，用过中饭，却有一起一起送行的络绎不绝。三公子匆匆会客，没些空闲。直至四点多钟，三公子才收抬下船。